The chevalier being void o' fear
Did march up Birsle Brae, man
And through Tranent e'er he did stent
As fast as he could gae, man
While General Cope did taunt and mock
Wie manies a loud hurrah, man
But e'er next morn proclaimed the cock
We heard another craw, man

The brave Lochiel, as I heard tell
Led Cameron on in cloods, man
The mornin' fair and clear the air
They loosed wie devilish thuds, man
The guns they threw and swords they drew
And soon did chase them aff, man
On Seaton's craft they burst their chafts
And gart them run like daft, man

The bluff dragoons swore blood and oons
They'd mak' the rebels run, man
And yet they flee when them they see
And winnae fire a gun, man
They turned their backs, the fit tae crack
Such terror siezed them a', man
Some wet their cheeks, some fyled their breeks
And some for fear did fa', man
Fear did fa', man
Fear did fa', man

Smith made sic' haste sae spurred his beast
'Twas little there he saw, man
Tae Berwick rade and safely said
"The Scots were rebels a', man"
O'er Soutra Hill ere he stood still
Afore he tasted meat, man
Lang may he brag o' his swift nag
That bore him aff sae fleet, man

But Gardner brave did still behave
Like to a hero bright, man
His courage true, like him were few
That still despised the flight, man
Ah for king and laws and country's cause
In honour's bed did fa', man
His life but not his courage fled
While he had breath tae draw, man

At yon thorn tree that you may see
Bewest the meadow mill, man
There's many slain lie on the plain
The clans pursuing still, man
Sic unco whacks and deadly hacks
I never saw the likes, man
Lost hands and heids cost them their deeds
That fell near Preston Dyke, man