aspice curvatos pomorum pondere ramos,
ut sua, quod peperit, vix ferat arbor onus.
aspice labentes iucundo murmure rivos:
aspice tondentes fertile gramen oves.
ecce petunt rupes praeruptaque saxa capellae:
iam referent haedis ubera plena suis.
pastor inaequali modulatur harundine carmen,
nec desunt comites, sedula turba, canes.
parte sonant alia silvae mugitibus altae,
et queritur vitulum mater abesse suum.
poma dat autumnus: formosa est messibus aestas;
ver praebet flores; igne levatur hiems.
temporibus certis maturam rusticus uvam
deligit, et nudo sub pede musta fluunt.